ილია ჭავჭავაძის დისშვილი კონსტანტინე (კოტე) აფხაზი დაიბადა 1867 წლის 27 ნოემბერს სოფელ კარდენახში. დაამთავრა თბილისის კადეტთა სასწავლებელი და პეტერბურგის სამხედრო აკადემია, მსახურობდა მეფის არმიაში და მიიღო გენერლის წოდება, მონაწილეობდა პირველ მსოფლიო ომში (1914-1918 წწ.). იყო თბილისის საადგილმამულო-სათავადაზნაურო ბანკის სამეურვეო კომიტეტის წევრი. 1917 წელს საქართველოში ეროვნულ-დემოკრატიული პოლიტიკური პარტია დაარსდა, რაშიც მნიშვნელოვანი წვლილი კოტე აფხაზს მიუძღვის. გარკვეული პერიოდის მანძილზე ის პარტიის თავმჯდომარის მოვალეობას ასრულებდა. 1917 წელს საქართველოს მართლმადიდებელი სამოციქულო ეკლესიამ წართმეული ავტოკეფალია აღიდგინა, რაშიც კოტე აფხაზი ასევე აქტიურ მონაწილეობას იღებდა. 1917 წელი სხვა მხრივაც გამორჩეული იყო საქართველოსთვის - იწყება აქტიური მზადება საქართველოს ეროვნული სახელმწიფოებრიობის აღსადგენად. საქართველოს დამოუკიდებლობის აღდგენის სათავეებთან იდგა საქართველოს ეროვნული საბჭო, რომლის ენერგიული წევრიც გახდა კოტე აფხაზი, რომელმაც ეროვნულ საბჭოს გადასცა ილიას ბანკის შენაძენი ქონება - 26 მილიონი ოქროს მანეთის ღირებულების. 1918 წლის 26 მაისს გამოცხადდა საქართველოს დამოუკიდებლობა - შემუშავებულ იქნა საქართველოს დამოუკიდებლობის აქტი, რომელსაც სხვა ქართველ პატრიოტებთან ერთად ხელი გენერალმა კოტე აფხაზმაც მიაწერა.

ფოტოზე: გენერალი კოტე აფხაზი (1867-1923)